كيف يصنع التوقع الإيجابي والتفاؤل فرقًا حقيقيًا في حياة أطفال صعوبات التعلم ؟
في فصول كتير، فيه طفل قاعد ساكت… مش علشان مش فاهم، لكن لأنه اتقاله قبل كده — بصريح العبارة — إنه “مش شاطر”.
أطفال صعوبات التعلم محتاجين دعم نفسي قد ما هم محتاجين دعم أكاديمي. وهنا بييجي دور التفكير الإيجابي، خصوصًا محور التوقع الإيجابي والتفاؤل.
يعني إيه توقع إيجابي؟
يعني الطفل يبقى داخل التجربة وهو متخيل إنه يقدر ينجح.
حتى لو وقع قبل كده… حتى لو الدرجات مش أحسن حاجة.
عالم النفس مارتن سليجمان أكد إن طريقة تفسير الطفل للفشل هي اللي تحدد استمراره أو انسحابه.
الطفل المتفائل بيقول: “المرة دي ما ظبطتش… بس أقدر أحاول تاني.”
أما الطفل اللي فقد التوقع الإيجابي بيقول: “أنا فاشل… ومفيش فايدة، الفرق مش في الذكاء… الفرق في الرسالة اللي الطفل بيكلم بيها نفسه.
توقف لثانية وفكر معايا، هل ابنك بيقول عن نفسه “أنا مش نافع”؟، قبل ما تزوده إحباط، اسأل نفسك: من أين جاءت له هذه الفكرة؟ غالبًا هي نتاج خبرات متراكمة، ودورك إنك تفك هذه الحلقة.
نزرع التوقع الإيجابي إزاي؟
أولًا: نغيّر لغتنا بدل “إنت دايمًا بتغلط”… “إنت بتحاول وده مهم”.
ثانيًا: نحتفل بالمجهود مش بالنتيجة
الطفل اللي بيقعد ساعة عشان يخلص سطرين، محتاج يسمع: “أنا شايف تعبك”.
ثالثًا: نعلّمه إن الفشل مرحلة مش هوية
لما يغلط، ما تقولش “إنت مش بتعرف تكتب”، قول “دي مهارة لسه بتتعلمها”.
رابعًا: نذكّره بنجاحاته
“افتكر امتى كتبت الكلمة دي صح الأسبوع اللي فات؟”
التفاؤل الحقيقي
مش إننا نضحك على الطفل ونقول له الدنيا وردي… التفاؤل الحقيقي إننا نقول له:
“أيوه في صعوبة… بس إنت قدّه.”
أطفال صعوبات التعلم بيعيشوا ضغط نفسي مضاعف: مقارنات، إحراج، إحساس إنهم أقل من زمايلهم. ولو فقدوا التوقع الإيجابي بدري، ممكن يدخلوا في دائرة انسحاب وقلق.
لكن لما نزرع فيهم التفاؤل، بنبني مناعة نفسية.
اسأل نفسك: ابنك شايف نفسه قادر؟ ولا شايفه دايمًا متأخر؟
التفكير الإيجابي مش كلمة تحفيزية… ده أسلوب تربية.
خلّوا رسالتكم واضحة
“إحنا مؤمنين بيك… قبل ما تنجح، وأثناء ما بتغلط، وبعد ما توصل.”
لأن أول خطوة في علاج صعوبات التعلم، هي إن الطفل يصدق إنه مش عاجز… وإن بكرة ممكن يكون أحسن من النهارده.
ومتنساش…
كل ما زرعت أمل، هتحصد قوة.
حتى لو الطريق طويل… احنا معاه.
